DADENGGRE: West Garo Hills a·jani Chibinang, Ringgi Demdema-ni Organic Producer Cooperative Society (OCPS) Limited, skanggipa changna a·jani nambatgipa ton 4 Anaros-rangko Pineapple Festival ong·nasienggipa Dilli Haat, New Delhi-ona Bristibaro watataha. Apsan dake Muktidata Cooperative Society, Tikrikila-oniba ton 5 Anaros-rangko apsan biaponan Sukrobaro watatskaaha.
Meghalaya Sorkarini Department of Agriculture aro Farmers Welfare-ni ning·o Directorate of Horticulture-ni dakchakanichi aro dilanichi Garo Hills-ni nambatgipa Anaros-rangko national platform-o mesokna aro game ge·e cha·giparangna nambata damko on·na ia namgipa a·bachengatani ong·a.
Wholesale damo ra·gipa bajarrang baksa melie, a·doko man·gipa nambatgipa biterangko watate saksa sakgipinona palritinganiko ba jatchio donge ra·ruragipako bon·atna, game ge·e chagiparangna nambata damko aro kamai bariatna miksonge a·bachengatani ong·a aro ian an·tangtangni ge·a gamatango pangchake janggi tangna man·an baksa mikkangchi a·jao nambatgipa Anaros biterangko bang·bate ong·katatna man·gen ine official-rang aganaha.
Official-rangni parakani gita, Delhiona watatgipa Anaros-rang rongprakni jrimani kg 1.6-oni 1.7 mang ong·a aro Chibinang-oni Anaros-rang dingtangmancha chi·ani 20° Brix level ong·e 16-17 Total Soluble Solids (TSS)-naba bata, jean a·jao chi·batsranggipa Anaros ong·a ine ma·sina man·aha.
Ia Anaros-rangko watatna gita District Horticulture Officer, West Garo Hills, Aldrina B. Marak; Agriculture Development Officer (Marketing), Tura, Moses G. Momin; Horticulture Development Officer, Tikrikilla Block, Silas G. Momin unbaksa consultant aro gipin departmental official-rang dakchakaha.
