GSMC dilgipa Balkarin, pattokoni jokbaa
TURA: Garo Hills Autonomous District Council (GHADC)-o MDC chakatna Schedule Tribe (ST) certificate-ko nangchongmotgipa dakchina batanggimin March jao dingtang dingtang NGO-rang aro A·chik A·songni manderangni jingjengatani ja·man dingtang dingtan NGO-ni dilgiparangko aro bang·a chadamberangko rim·e pattoko donataha. Uamangoni Garoland State Movement Committee (GSMC)-ni Chairman Balkarin Ch Marak-ba pattoko chipatako man·aha. Ua ja-brimangna pattoko dongani ja·mano July tariko Jowai pattok nokoni jokbapil·aha.
“GHADC-o MDC chakatna ST certificate-ko nangchongmotgipa dakna nanga ine dabianira angna ong·ja, ian A·chik jatna aro A·chik A·songni manderangnasa ong·a. Unigimin ia dabianio jat gimik chakpaanina aro ia dabianio chu·sokgipa ong·ahanina anga A·chik A·songni manderangko mittela. Unbaksa jabrimangna angni Jowai pattoko dongmiting somaio angna dakchakgipa sakantikoba anga mittela” pattokoni ong·katpila ja·man GSMC dilgipa Balkarin Ch Marak aganaha.
Apsandake A·chik A·songni manderangko mittelpilskae aganengon “Da·alo A·chik jatni saksa matgrik Balkarin Ch Marak, Jowai pattokoni jokaha, indake uni pattoko sal 108-na dongmiting somaio uni aro GSMC-ni duk mikchini somaio chingna chakpagipa aro on·gilgipa sakanti A·chik A·songni manderangko GSMC-ni palo mittela” ine GSMC-ni Evironment Secretary J.R Marak aganaha.
Pattokni jokbaani somoio, GSMC-ni dilgiparang uko Marak-ko mande ra·e rimchaksoaha.
