BAGHMARA: South Garo Hills, Gasuapara Block-ni ning·o ga·akgipa Sibbari Bamongre songo Dareng chibimako dolong kasota dongjani a·sel ua jolo songdonggipa manderang bang·a neng·nikanirangko chagrongna nangengani gimin Dareng chibimako dolong kae on·china Sibbari Bamongre songoni saksa Sundaybirth M Sangma South Garo Hills, Deputy Commissioner-na sedoaha.
Jolo dolong dongjani a·sel jolni manderang sagipa dinggipa aro an·o gnanggipa ma·giparangko hospitalchi ra·na-dona, school bi·sarang aro butchuma budeparang chongipa ringo ia chibimako ga·bate songrena nangenga. Wachina somaiode chi dala batroroe namen kenchakani ong·a.
Sibbari Bamongre aro sepangjolo donggipa songrang ru·uta bilsirangna iandakgipa neng·nikaniko chagrongna nangenga. Uni gmin Sibbari Bamongre-o Dareng chibimako pangkamgipa dolongko kae on·china didiangaha. Jedakode mikkangchi bang·a manderangni janggiko jokatna man·gen aro sana bananiko ra·na, school re·na aro bajar anti cha·na nambata dakchakani ong·gen ine chittio janapaha.
