SHILLONG: New Shillong-o rikenggipa dingtang dingtang project-rangko Mongolbar salo, a·dokni Chief Minister Conrad K Sangma nipilangaha aro ia project-rangko niangani somoio a·dokni Chief Minister baksana Chief Secretary, Urban Affairs Department-ni Commissioner & Secretary, dal·dalgipa sorkari official-rang aro gipinrangba dongpaaha.
New Shillong-o rikenggipa kamrangko niangengon, a·dokni Chief Minister, New Secretariat Complex, Unity Mall, Umsawli-ni Sports Complex aro gipin kamrangkoba niangaha.
New Secretariat Complex-o a·dokni Chief Minister, nokko rikanio baditana kingking kamrang ta·rakenga, uko niangenba, kamrangko somoi gita matchotatna nangengani gimin aganangaha. Ia New Secretariat Complex-ko rika matchotahaode, sorkarini kamrangko nambate ka·na man·na gita pilak department-rangan ia apsan nokon kamrangko ka·gnok.
Unity Mall-ni kamrangko niangengon, ia noko, jakni kamko ka·giparang, ba·ra dokgiparang, bading chiwalgiparang, self help group-rang aro ma·manti bosturangko tarigiparang, an·tangtangni bosturangko palna sim·na man·na gita ia nokko ta·rake matchotatchina Chief Minister aganangaha.
Umsawli-o rikenggipa Sports Complex-ko niangengon, ia nokko, a·dokni chadamberangna nambatsranggipa kal·chakram ong·atna sorkari nangnikenga ine Chief Minister aganaha.
Chief Minister-ni aganani gitade, New Shillong-o rikenggipa project-rang ba nokrangara, Meghalaya a·dokni mikkangchina pangchakaniko songani gitasa ong·enga.
Sorkarini kamrangna, bading chiwalanirangna aro kal·chakram biaprangna gital chasongni nokrangko rikaniara sorkarini kamrangko aro manderangna dangdike on·aniko namdapatasan ong·aigija kamrangko ong·katatna, bading chiwalanirangko tang·doatna aro a·doko songdongenggipa manderangni janggi tangani gadangko namdapatna dakchakani ong·gen ineba Chief Minister parakataha.
