Garo Labour Corps-ni Research Committee-na gong lak 2-ko on·na Assembly Speaker ku·rachaka
TURA: First World War ba a·gilsak gimikni skanggipa dakgrikanio France a·songona dakchakna re·anggipa Garo Labour Corps-ko bilsianti manirongbaenga gitan ia bilsioba chang 108-gipa Garo Labour Corps Day-ko mijal Bristibar salo maniangaha. Ia program-ko Tura Babupara-o gital rikenggipa Garo Labour Corps-ni Cenotaph-ko matchotkujaengani gimin Tura District Auditorium-o ong·ate, Urban Marketing Hub Parking-o pulrangko on·e mande ra·aniko dakangaha.
Ia salko manianio, Meghalaya Legislative Assembly-ni Speaker, Thomas A Sangma mongsonggipa sokgipa ong·e bak ra·angaha aro unbaksana a·dokni PHE Minister aro Preservation of Garo Culture & Heritage Committee-ni Chairman Marcuise N Marak, West Garo Hills a·jani Deputy Commissioner Vibhor Aggarwal, Superintendent of Police (SP) Abraham T Sangma, gitcham MCS Officer Chryslin T Sangma, TMB-ni Chairman JD Sangma, TMB-ni CEO Jude Rangku T Sangma, Don Bosco College Higher Secondary Section-ni Principal Father Januarius S Sangma, NGO-rang, butchuma budeparang aro dingtang dingtang skulni chatro chatrirangba bak ra·angaha.
Manianiona mongsonggipa ong·e sokgipa Assembly-ni Speaker Thomas A Sangma, jinmana aganprakangengon, begal olgiparangko maina dal·e ra·na ba manina nanga ine chasong gitalo ia manianiko dal·e ra·breja indiba jatni pagitchamrang France a·songona re·ange A·chik jatni gunko uamangni kakketaniko uamang sakki on·eaha uni gimin A·chik jat uamangko gisik ra·na aro mande ra·na nangchongmota ine aganaha.
Dakgrikaniona re·anggipa A·chik pagitchamrangni gunrangko aganangskaengon, “Uamangko begal chilna rimanggenchimoba, sin·begipa surirango donggenchimoba, slai gam·ani aro a·dubekrango dongna nanggenchimoba uamang jenan re·anga kengija ka·donge aro kakket ong·e dangdike on·aha,” ine Sangma aganenba, mikkangchi Garo Labour Corps-ni chu·gimik manderangko sandina Research Committee team-na an·tangni dormahaoniko gong lak 2 tangkako on·na ku·chakangaha. Ia tangkako Tura Municipal Board-oniko ra·ena gita man·gen ineba Assembly Speaker Thomas A Sangma jinmana aganangaha.
Ia tom·anio a·dokni PHE Minister aro Preservation of Garo Culture & Heritage Committee-ni Chairman Marcuise N Marak-ba jinmana aganprakangengon, “Da·alo gita ua somaio an·chingko sason ka·gipa an·chingni rajana dakgrikchakna chel·chakaniko on·a re·ange an·ching A·chik jatni bimungrangkoba War Memorial-o segataha, uni gimin an·ching da·alo an·chingni pagitchamrangko dal·e ra·na nanga aro gisik ra·na krachongmota,” ine aganaha.
Garo Labour Corps-ko gital dake rikpiltaianio adita meligrikgijanirang dongahani gimin Preservation of Garo Culture & Heritage, Research Committee-ko songaha aro ia Committee, jatni dilgiparang aro NGO-rang baksa changni chang tom·aniko ong·ate da·alo gital Cenotaph-ko rikpiltaina man·engaha aro kamrang 90 percent kamrang matchotengaha ine janapatengon, mikkang bilside ia biapon Garo Labour Corps Day-ko manitaina cholko man·gnok ine Marak parakataha.
Gital Cenotaph-o Museum-koba dona tik ka·ahani gimin Garo Labour Corps-ni de-su·drangrang, jemangon medal-rang aro slairang dongachim, uarangko namnikgenchimode ia Museum-ona ra·bae dona gita man·gen aro uamangni bimungrangko iano tape dongen ineba PHE Minister Marcuise N Marak aganangaha.
Ia tom·anio gitcham MCS Officer Chrysline T Sangma, an·tangni chonmiting somaio Garo Labour Corps Day-ko manianiko gisik ra·atpile jinma aganangskaengon, “Anga da·alo bilsi 77 ong·piljok chingni chonmitingo chingade July 15 tarikon skul noksamni pulrangko saoba dawilike saoba chisol dake tarie donsoa, uandake July 16 tarikode pringnin skulona tom·batoka. Unomitingde skul uniform-rang dongpaja, je chola dongako gane skulchi ja·arara re·a uandake skulo tom·dakchenge, Babupara-o tarigipa Cenotaph-ona riting riting dake re·ange an·tangtangni tarigimin pulrangko done gisik ra·e manironga,” ine aganaha. Garo Labour Corps-ni gimin adita talataniko on·angengon, da·alonaba uamangko gisik ra·e maniangkuenganina aro an·tangba iano bak ra·pana man·enganina ua an·tangni kusi ong·aniko parakangaha.
Manianiko a·bachengatanio, Tura Don Bosco College-ni Principal Fr. Januarius S Sangma, nokgipa Isolo bi·angaha aro Tura Municipal Board (TMB)-ni Chairman JD Sangma, rimchaksoani kattarangko aganangskaaha. Uandake ia program-o sak 17 Garo Labour Corps-ni de-su·drangrangna mande ra·pilskaaniba dakangaha.
Ia tom·anio, Harding Theological College, Bosco Mount, Rongkhon aro Do·kaku Art & Culture Association, knatobegipa ku·rangrangchi gitrangko ring·e manderangko an·saoatangaha.
