Hospital-rango an·pakaniko 90% batatna nisan donenga: CM
SHILLONG: Meghalaya a·doko an·seng baljokaniko on·ani, mongsongbate ma·giparangna aro bi·sarangna an·seng baljokaniko on·anio kamrangko Bristibar salo, a·dokni Chief Minister Conrad K Sangma nipilangaha aro ia tom·anio a·dokni Health Minister Wailadmiki Shylla baksana Health department-ni dingtang dingtang official-rangba dongpae bak ra·angaha.
Ia tom·anio, Megha Health Insurance Scheme (MHIS)-ni ning·o a·dokni chu·sokanirangko nipilangengon, National Family Health Survey (NFHS-6)-ni ning·o, mongsongbate hospital-rango an·pakanirang batroroengahani a·sel, an·pakani somoirango ma·giparangni sianirangko komiatna man·engahani giminba Chief Minister, kamrangko nipilangaha.
An·o donggipa me·chikrangko hospital ba health centre-rangona sale on·na cholko on·gipa Chief Minister’s Safe Motherhood Scheme (CM-SMS) gita dakgipa kamrangko a·bachengate on·ahani gimin da·o hospital-rango an·pakanirang tang·doangaha ineba ia tom·nio Chief Minister aganaha. Ia kamo bewalan chu·sokgipa ong·aniko nikna man·engoba sorkari, hospital ba health centre-rango an·pakaniko 90 percent batatna nisanko donenga ineba Chief Minister parakataha.
ANM, ASHA aro Anganwadi worker-rangchi, an·o donggipa me·chikrangna nirok simsakaniko namdapatna gitaba ia tom·anio chanchirimangaha.
Janggi tangani bewalrangko dingtangatanichi, batrikrikna man·gijagipa sabisirang, jekai high blood pressure ba uandakgipa sabisirangko chel·chakna gita manderangna mikrakatanirangko ba u·iatna nanganirangkoba ia tom·anio Chief Minister janapangaha.
