TURA: Garo Hills Autonomous District Council (GHADC)-o National People’s Party (NPP)-ni dilanichi Garo Hills Democratic Coalition (GHDC), gital executive committee (EC)-ko rikna tariengahani gimin GHADC-o namroro silroroanina Congress dol, opposition dolni kamko ka·angskagen ine u·iataha.
Sombar salo, West Garo Hills a·jani Deputy Commissioner Ram Singh-ni dilanichi gital seokako man·gipa GHADC-ni sak 29 MDC-rang, ku·mikchet-aniko dakangaha aro ia apsan salon, Congress dolni dilgiparang, gital seokako man·gipa Congress dolni sak 12 MDC-rang baksa Tura-ni Congress Bhawan-o tom·aniko ong·atangaha.
Congress dolni tom·a matchotani ja·mano Congress dolni dilgipa Zenith M Sangma, kobor ra·tim-giparang baksa agan-grikengon, GHADC-ni namgnina aro Garo Hills-o
songdongenggipa manderangni namgnina Congress dol, opposition dol ong·e executive committee-ni kamrangko nirikkianggen aro kam mingantikon sing·rikkigen ine parakataha.
“Ia election-o mai ong·aha an·ching sakantian nika aro ma·sia. Election-o chena gita NPP dol, tangka paisarangko aro a·dokni gam-jinrangko jakkalahaoba manderang Congress dolko bang·bate seokanichi NPP-ko jegaltokaha. Ian tangka paisarangko jakkale election-o susagiparangna skidapani ong·gen,” ine Zenith Sangma aganaha.
Independent aro GNC-ni MDC-rang baksa nangrime GHADC-o gital EC-ko rikna Congress dol tariahachim indiba MDC-rangko NPP dol, tangka paisa aro gam-jinrangko ku·rachake sale kataha ineba Congress dolni dilgipa parakataha.
