Bazar-rango mask gangijako rim·a man·ode gong 1000-ko dai gamna nanggen: Dy Com

TURA: A·songni gipin biaprango gitan Megha-laya a·dokni dingtang dingtang biaprangoba skangona bate ia chango changdok ta·rakbate COVID giproroengani gimin sabisini giproroaniko champengsona gita mijal Mongolbar salo, West Garo Hills a·jaoba District Level COVID-19 Committee-ni tom·aniko Tura-ni DRDA conference hall-o ong·atangaha aro ia tom·anio West Garo Hills a·jani Deputy Commissioner Ram Singh, tom·anio bak ra·giparangna agan-prakengon, mande jinmao aro mongsongbate anti cha·ram biaprango mask gangijako rim·a man·gen-chimode gong 1000 tang-kako dai dake ra·gen ine mikrakataniko on·angaha.
Singh-ni aganani gitade, gipin biaprangoni re·ba-enggipa manderangko Bajengdoba-o porikka ra·e nisona a·bachengattaiaha aro gipin a·dokrangoni Meghalaya a·dokona re·baenggipa manderang online gita bimingrangko segatchengna nangenga.
Gipin biaprangoni re·baenggipa manderang RT-PCR test-ko ka·na
nangchongmota ine janapatengon, RT-PCR-ni porikka ra·ani da·o konta 48-nasan choliaignok aro porikka ra·anio saoba positive ong·genchimode ua sal 10-na noktango dingtang nape dongna nanggen ine Deputy Commissioner parakataha.
Tura Civil Hospital-ni COVID ward-o ICU baksa ge 30-40-mangni palangrang dongaha ine talatangengon, ICU gita dakgipa biaprangkode bilonge sagiparangnasa donenga aro maming chin gri positive ong·giparangde noktangtangon dingtang nape dongna nangaigen ine Singh parakataha. Obosta namjabatenggipa manderangkode dingtang dingtang quarantine centre ba Corona care centre-rango done sannaniko on·gen ineba DC parakataha.
Tika su·e ra·na man·enggipa manderangkode dingtang dingtang health centre-rangona re·ange tikarangko su·e ra·china didiangengon, West Garo Hills a·jao chu·onga gitan samrang donga ine DC parakatenba, sorkarini dongimin dingtang dingtang niamrangko ja·rikjringchina manderangko didiataha.
April 16 tarik dipetan mela ba uandakgipa program-rangko ong·atna on·jaengaha ine janapatengon, gilja ka·ani ba uandakgipa songsalo tom·bimonganirango bak 10-oni bak 5-na bate tom·jachina DC didiataha.
Da·o dipet West Garo Hills a·jao obostarang namkalkuengani gimin skul aro dokkanrangkode kulina on·aikugen indiba district administration, obostarangko name nirokanggen ine Singh parakataha.
Ia tom·anio dongpae bakko ra·anggipa gipin manderangara, West Garo Hills a·jani Superintendent of Police MGR Kumar, Tura Municipal Board-ni CEO R Ch Sangma, EAC MLK Marak, dingtang dingtang department-ni officer-rang, mondolini dilgiparang, development committee-ni dilgiparang, bazar committee-rang, self help group-rang aro gipinrang ong·a.