SHILLONG: Garo Hills Autonomous District Council (GHADC)-o National People’s Party (NPP) aro Bharatiya Janata Party (BJP) dolrang meligrikna man·jaenga ine agananiko Meghalaya a·dokni Health Minister aro BJP-ni MLA AL Hek jegalatenba, BJP-ni MDC-rangkoba NPP-chi dilenggipa executive committee (EC)-o bakrimchina gita ge·etmanaha ine parakataha.
Ia chang GHADC election-o BJP dolba Tura aro Barengapara constituency-rangko cheahachim aro da·o Barengapara-ni MDC Promod Koch-de NPP-chi dilenggipa Garo Hills Democratic Coalition (GHDC)-ni EC-o bakrimahaoba Tura-ni MDC Bernard N Marak-de bakrimskakujaengachim ine nikna man·a.
Indake ong·engon, ma·mongo BJP-ni dilgiparangan GHADC-o BJP-ni MDC-rangko NPP baksa bakrimchina nangnikengani gimin BJP-ni MDC sakgnikon NPP-chi dilenggipa EC-o bakrimchina u·iataha ine Hek parakataha.
“Ma·mongko dilgiparangonin ge·etaniko on·manahani gimin chinga NPP baksa bakrimenga. Congress dolna agrede chinga sason ka·enggipa je dolrang baksaba bakrimna kusi ong·aigen. Tura-ni MDC Bernard Marak-koba chinga NPP-chi dilenggipa EC-o bakrimchina u·iataha,” ine BJP-ni dilgipa parakataha.
NPP-chi dilenggipa EC-o BJP-ni MDC saksako executive membor songchinaba uamang mol·molataha ineba Hek parakataha.
“Sako executive committee-o rimnapgen uade chief executive membor (CEM)-ni skaosa ong·aia indiba chinga chingni MDC saksana biapko on·china mol·molataha,” ine Hek aganaha.
Candidate-rangna tikitko on·na skang BJP-ni state president Ernest Mawrie, Garo Hills-ni dilgiparang baksa agangrikchengjaha ine matnanganirangko jegalatengon, committee baksa agangrikchengesa Mawrie, tikitrangko sualaha ine Hek talatangaha.
Ia chang GHADC election-o candidate sakgni cheanichi BJP chu·sokgipa ong·aha ine an·tangni kusi ong·aniko parakatengon, 2023 bilsini Assembly election-de Meghalaya a·doko BJP dol bang·bata seat-rangko chegnok ine Hek, an·tangni ka·dongsoenganiko parakataha.
