TURA: Mijal Budbar salo, Garo Hills Autonomous District Council (GHADC)-ni gital Chairman-ko seokna gita election-ko ong·atanio National People’s Party (NPP)-ni Rakesh A Sangma chee, kamtangko jako ra·angjolaha.
GHADC election-o ua Babelapara constituency-oni susae NCP-ni state president Saleng A Sangma-ko cheahachim aro uandaken mijal Budbar salo, GHADC-ni gital chairman-ko seokna election-ko ong·atanioba ua Congress dolni Cherak Momin-ko chee gital chairman-na seokako man·aha.
GHADC-ni gital chairman-ko seokna election-ko ong·atanio NPP-ni Rakesh A Sangma, 16 vote-rangko man·aha aro Congress dolni Cherak Momin, 12 vote-rangkosan man·aiahachim.
Gital chairman-ko seokna election-ko ong·atanio sak 28 MDC-rang pu·onne bakko ra·angaha indiba BJP-ni MDC Bernard N Marak bakko ra·skajaha.
Gital chairman-na seokako man·ani ja·mano Rakesh Sangma-ko GHADC-ni ja·delbatsranggipa MDC sakgni, chong·motan NPP-ni Benedic R Marak aro Congress dolni Sadhiarani M Sangma, uni asongchakram biapona dilangaha.
