TURA: Garo Students Union (GSU) Southern Zone-ni dingtang dingtang dabianirangko jabrini gisepon chu·sokate on·na ku·rachakataha ine GSU-SZ-ni songbadrango parakataniko Rongrikkimgre-ni gital MDC aro GHADC-ni gital deputy chief executive membor-na mingako man·enggipa Nikman Ch Marak jegalatenba, ua GSU-ni dilgiparangna uamangni dabianirangko jabrini gisepon chu·sokatgen inede ku·rachakaniko on·jahachim ine talataniko on·angaha.
Mikkangchi GHADC election-rango Tribal ong·gijagipa manderang bak ra·pana man·jana gita dingtang electoral roll-ko tarichina, GHADC election-o Tribal ong·gijagipa candidate-rangni susapaaniko chu·gimik champengatchina, GHADC-o kam ka·enggipa manderang bilsi gittam ong·na sipile dormaharangko man·tokkujaengani gimin ta·raken dormaharangko on·china aro Garo Customary Law (GCL)-ko ta·raken pass ka·e be·en pil·atchina gita didie re·anggipa Mongolbar salo GSU-SZ-ni dilgiparang, Rongrikkimgre-ni MDC Nikman Ch Marak-ko grongeaha aro ua ia dabianirangko jabrini gisepon chu·sokate on·na ku·rachakataha ine GSU-SZ-ni dilgiparang, kobor setimgiparangna seachi u·iatahachim.
Indake ong·engon, GSU-SZ-ni dabianirangko ua niatna ku·rachakataha indiba dabianirangko chu·sokatna somoini giminde ua mamingkoba janapatjahachim ine Marak talataniko on·atskaaha.