TURA: Garo Hills Autonomous District Council (GHADC)-o gimagimin mikkim rasongko ra·bapilna gita gital seokako man·gipa chief executive membor (CEM) Benedic R Marak, Garo Hills-ni manderangna ku·rachakaniko on·angaha.
GHADC-ni gital CEM-ko seokna gita election-ko ong·atanio NPP-ni MDC Benedic Marak 16 vote-rangko man·e, 12 vote-rangko man·rikgipa Congress dolni MDC Sadhiarani M Sangma-ko vote ge 4-chi chena man·ahachim.
Gital CEM-na seokako man·ani ja·mano Marak, district council-ni membor-rangna aganprakengon, dingtang dingtang kamrangni a·sel GHADC-o neng·nikanirangko chagrongna nangenga aro ia neng·nikanirangko namatanian uni mongsonggipa daito ong·enga ine parakataha.
“Dingtang dingtang kamrangni bidingo an·chingni GHADC matnanganirangko man·enga aro ia neng·nikanirangko namate GHADC-ni mikkim rasongko ra·bapilanian angni aro chingni gital EC-ni daito ong·enga. Ia neng·nikanirangko namataniara altua kam ong·jawa indiba kam ka·anirango dingtanganiko ra·bana chinga kamrangko a·bachengengaha,” ine GHADC-ni gital CEM parakataha.
Gital CEM-ni aganani gitade, A·chikrangni songsalko aro A·chikrangni daka rikaniko nirok sandianiara district council-ni jakon ong·a aro A·chikrangni nitoaniko ripinge a·gilsakna mesokna gita kamrangko ka·na nangenga.
“District council-ni kam mingantiko ka·anion anga na·simang sakantini agan-ku·pattianirangko ra·gen ine ang council-na ku·rachakenga. An·ching pilakan iano Garo Hills-o songdongenggipa manderangni namgninasa ong·enga,” ine Marak parakataha.
