U·IATTIMGIPAONI
TURA: West Garo Hills a·jao COVID-19-ko warachakangkuna gita night curfew-ko re·baenggipa April 30 tarikona ra·dodapataha ine West Garo Hills a·jani Deputy Commissioner u·iataha.
West Garo Hills a·jao night curfew-ko walni 11:00 bajioni pring 5:00 bajiona ra·gatkuengani gimin ia curfew-ni somoirango manderangni nok compound-rangona agrede gipin biaprang jekai bazar anti, rama sorok, kal·chakram ba uandakgipa biaprango mande sakbonga ba una bate tom·chimongna ba re·rurana man·jawa ine West Garo Hills a·jani Deputy Commissioner Ram Singh u·iataha.
Deputy Commissioner-ni u·iatani gitade, skulrangko dingtang dingtang niamrango pangchake kulichina gita sorkari ge·etaniko on·manahani gimin West Garo Hills a·jaoba sorkarini dongimin niamrango pangchake skulrangko kulina man·gen.
Olakkiram nokrangkoba kulina gita sorkari gital niamrangko on·manahani gimin ia niamrango pangchake a·jao donggipa olakkiram nokrangkoba kuliangkugen.
Kam nangchongmotana nokoni ong·katengon, mask-rangko ganjringchina aro rongtal an·talaniko rakkichina gitaba DC u·iataha.
Mande jinmani biaprango aro kam ka·chakram biaprango skatang stujachina aro ta·makkurangko jakkaljachina gitaba DC mikrakataniko on·angaha.
Sorkarini dongimin niamrangko pe·genchimode Epidemic Disease Act 1897-ni Section 2-ni ning·o on·gimin bilrango pangchake dongimin officer-rang, ja·kurangko de·anggen ineba DC mikrakataha.
Curfew-ni somoio police-rang, fire & emergency service, medical, MeECL, PHE, PWD, Press aro uandake nangchongmotgipa kamrangko ka·enggipa dolrangkode champengani dongjawa ine DC u·iataha.
