U·IATTIMGIPAONI
Shillong: A·doko, uandake a·gilsak gimiko giproroenggipa COVID-19 sabisiko a·dok sorkarini krenge dakgrikchakanio jak snilpaani pal gita dake Meghalaya Sorkarini Cabinet Minister-rang uamangni jagittamni dormahaoniko 10 percent-ko Chief Minister-ni Relief Fund (CMRF)-na on·gilattokaha ine Chief Minister Conrad K Sangma Sukrobaro aganaha.
‘‘January-oni March jaona, jagittamni 10 percent dormahako CM Relief Fund-na on·gilani gimin anga chingni Minister-rangko mittela, jemangni ka·sae on·gilatgipaan Tg. 3,53,250/- gapangaha’’ ine Chief Minister tweet ka·aha.
Unaskang, A·doko COVID-19 sabisini jelroroaniko maikae champengna aro komiatna man·gen, iani bidingo pilak dam 11 district-ni deputy Commissioner-rang baksa Chief Minister virtual meeting-ko ba video gita agangrikaniko dakangaha.
‘‘Kenchakani batgipa biaprango sandian baksa gnigipa gadangni ba tika su·aniko dingchikbatatna nanga,’’ ineba ua aganaha.
Da·omiting, a·doko COVID active case 1,000-san batkuoba aroba sabisi man·e sianggiparang sak 157-san ong·kuoba, gnigipa changna jelrikrikbataienggipa COVID sabisiko bilake warachaksona gita sorkari tikkelenga.
Unomitingo, nangchongmota ong·gijagipa dokkanrangkode re·baenggipa April 26-oni April 30 tarikona chipatkuna tik ka·aha ine saksa a·gipi health official aganaha.
Unagreba, a·dok sorkari school, college, aro university-rangkoba 4 tarikoba chipataha, aro sorkari aro private office-rangoba kam ka·giparangko 30 percent-ona komiatchina gita ge·etaniko on·aha.
