SHILLONG: Nangrimgimin dolrangni gisepo dolskani nangnikanirangko dal·e ra·gijaniara dolsa dolgipinko mande ra·grikja gita ong·enga ine United Democratic Party (UDP) parakataha.
Nangrimgimin dolrangni gisepo pangnan nangchongmotgipa kamrangni giminde apsan asonge chanchirimna nangchongmota ine janapatengon, “Iandake nangchongmotgipa kamrangkon sorkari dal·e ra·jagenchimode uamang nangrimenggipa dolrangna mande ra·ani dongja ine mesokani ong·enga,” ine UDP-ni general secretary Jemino Mawthoh parakataha.
Dingtang dingtang dolrang nangrime sorkariko chalaienga ong·ode, mongsonggipa kamrangko pangnan nichengna nanga aro dolsa dolgipinko mande ra·grikna nanga ineba Mawthoh aganaha.
Power department-o ong·enggipa obostarangko UDP dolsa jinmani nikaniona ra·baaha ineba UDP-ni general secretary parakataha.
“Ia kamrangni bidingo kakketko ma·sina gita da·ode department-o ong·enggipa obostarangko am·sandina nangengaha,” ine Mawthoh aganaha.
Mawthoh-ni parakatani gitade, Power department-o ong·enggipa obostarangni bidingo UDP aditade chanchirimanaha aro re·baenggipa antioba uamang name chanchirimangkugen.
“MeECL aro Power department-ni bidingo chinga aganenga maina manderang namen neng·nikanirangko chagrongna nangtokengaha,” ine ua aganaha.
Power Minister James Sangma-ko ra·galchina dabienggipani bidingo ja·kuko de·china uamang a·dokni Chief Minister Conrad K Sangma-ni jako pakwate on·manaha ineba UDP-ni general secretary parakataha.