TURA: Sabisirangni giproroengmiting somoio cholrangko ra·e manderangni nangchongmotgipa bosturang, jekai mirong, dal, to, kari aro uandakgipa bosturangko dam bate paljachina gita South West Garo Hills a·jani Deputy Commissioner Ch Ramakrishna, dokkan dakgiparangna mikrakataniko on·angaha.
Meghalaya a·dokoba COVID-19 ta·rakbate giproroengahani gimin South West Garo Hills a·jao manderangni nangchongmotgipa bosturang, jekai mirong, dal aro uandakgipa bosturangko nipilna gita Mongolbar salo South West Garo Hills a·jani Deputy Commissioner, bosturangko salbaenggipa manderang, dokkan dakgipa-rang, NGO-rang aro dingtang dingtang songni dilgiparang baksa tom·aniko ong·atangaha aro ia tom·anio ua manderangni nangchongmotgipa bosturangko dam bate paljachina mikrakataniko on·angaha.
Manderangni cha·ani bosturang baksana petrol, diesel, LPG aro uandakgipa bosturangko South West Garo Hills a·jaona sokatani bidingoba ia tom·anio Deputy Commissioner chanchirimdilangaha.
Da·o dipet a·dok damsaoni damgipinona manderangko aro bosturangko salruraenggipa garirangna maming pass-rangko nangkujaenga ine talatangengon, manderangko aro bosturangko salruraanio maiba neng·nikanirangko chagrongna nanggenchimode Deputy Commissioner ba Superintendent of Police (SP)-na u·iatna man·gen ineba SWGH a·jani Deputy Commissioner parakataha.
Mirong aro uandakgipa bosturangko chu·onga gita ra·bae donchina Food & Civil Supplies department-ko didiangengon, sorkarini on·atenggipa ma·manti bosturangko somoi gita manderangona sokate on·china DC didiangaha.
Bilsi 45 badegimin manderangko tika su·e ra·china didiangengon, tikarangko su·e ra·anichisan ia sabisioniko naljoke rakkina man·gen ine Ch Ramakrishna parakataha.
Ia tom·anio Salmanpara-ni MLA WD Sangma-ba dongpae jinmana aganprakengon, COVID-19-ni niamrangko ja·rikna nangchongmotani gimin janapangenba, ia niamrangni gimin songo noko aro jillarango songdongenggipa manderangna agan-talate on·china didiangaha.
“Ia COVID-19 sabisiara asolan ong·a aro an·ching an·chingni samtangtangon ong·enggipa obostarangko nikna man·engaha. Je manderang, mande jinma baksa agangrikrongna nanga, uamang an·tangtangna simsakbena nanga. Dokkanrango donggiparangba COVID-ni tikarangko su·na nanga aro bostu brena re·angenggipa manderangkoba COVID-ni niamrangko ja·rikchina didina nanga,” ine Sangma aganaha.