NEW DELHI: COVID-19-ko warachakanio tangka paisani gita dakchakanirangko on·pana man·na gita ma·mong sorkarini ra·galpilgimin Member of Parliament Local Area Development (MPLAD) scheme-ko MP-rangna ra·gatpiltaichina gita Budbar salo, Tura-ni MP aro gitcham Union Minister Agatha K Sangma, a·songni Prime Minister-ko mol·molataha.
Iani bidingo a·songni Prime Minister Narendra Modi-na seachi u·iatengon, Tura-o sanna banani cholrang komiengoba ua tangka paisani gita dakchakanirangko on·pana man·jaenga ine Agatha parakataha.
Adita salrangna skang, Tura-o District Development Coordination & Monitoring Committee (DISHA)-ni tom·aniko ong·ate ua a·jani official-rang baksa chanchirimanio, uni constituency-o donggipa primary aro community health centre-rangni obostarang namangjaengaha ine ua ma·sina man·aha ine Agatha parakataha.
Ia MPLAD scheme-ni ning·o MP-rang, an·tangtangni constituency-na bilsiantian gong kror 5 tangkarangko jakkale namroro silroroani kamrangko ka·na man·achim ine nikna man·a. Indake ong·genchimoba, COVID-19-ni a·sel a·songo man·enggipa neng·nikanirangko namatpilna ia scheme-ni tangka paisarangko sorkarini kamrango jakkalskana gita ia MPLAD scheme-ko dontongatchengskaahachim.
Indake ong·engon, komibeoba constituency-tangtangni primary health centre-rangko aro civil hospital-rangko namdapatna gita ia MPLAD scheme-ko ra·gatpiltaina nanga ine Agatha aganaha.
“MPLAD scheme-ko ra·galani bilsigni gapengahani gimin obostarangko namatpilna gita tangka paisarangko on·gilpana man·jae anga namen suk ong·ja,” ine Sangma parakataha.
“Ia sal somoirango an·chingni a·song namen neng·begipa somoiko chagrongna nangenga aro ia sajinmako an·ching re·anggipa bilsio gitan chepiltaina nanggen,” ine Tura-ni MP aganaha.
