U·IATTIMGIPAONI
SHILLONG: Meghalaya a·doko ta·rakbee COVID-19 giproroengani gimin a·dokni mongsonggipa biap damgittam, chong·motan Shillong, Tura aro Jowai-o manderangni re·ruraani, bazar anti cha·ani aro kam ka·anirangko Sonibar pring dipet sal 10-na champengatanggnok.
Sonibar pring 5:00 bajionin champengatanirangko a·bachengatengahani gimin Sukrobar attamo, ia biap damgittamon manderangni koros ka·chichaanirangko nikna gita man·angaha.
Sukrobar attamo, ATM, chu dokkan, mirong dokkan aro uandake manderangni nanggipa pilak dokkanrangon manderangni riting dake koros ka·na senganirangko nikna man·aha.
East Khasi Hills a·jani Deputy Commissioner Isawanda Laloo-ni u·iatani gitade, ia champengatani somoirango local taxi aro autorickshaw-rang 25 percent-ni gitasan manderangko gate salna man·aigen.
Shillong-o nangchongmotgipa kamrangko ka·enggiparangna agrede gipin garirang re·rurana man·jawa ine u·iatengon, nangchongmota kamna a·ja damsaoni damsaona aro a·dok damsaoni damgipinona re·rurana nangenggipa manderangna district administration, pass-rangko on·gen indiba sorkarini dongimin niamrangko ja·rikna nanggen ine East Khasi Hills-ni DC parakataha.