SHILLONG: East Khasi Hills District-o Covid-19 sabisi man·gipa bang·batrikrikengani bidingo, sabisini jelrikrikaoniko champengna gita Meghalaya Home (Political) Department-ni batanggimin April 28, 2021 tariko hukum on·atgipao pangchake, a·jani ning·o ga·akgipa Indo-Bangla sima-ari jolo donggipa a·song damgnini bading-chiwalgrikani cholgugarangko re·baenggipa May 10 tarikona kingking gipin hukumko man·sokujaskal chipe donatchengchina ine East Khasi Hills-ni District Magistrate mni April 30, 2021 tariko ge·etangaha.
East Khasi Hills-ni District Magistrate-ni hukumo janapani gitade, a·jani ning·o ga·akgipa sima-ari jolrango antio changprak anti cha·gipa bajarrangkoba chipatchengchina didiataha.
Bajar-antirango manderangni nangchongmotgipa mal-bosturangko palenggipa dokanrangkode songdonggipa manderangni nanganirangko nigrike a·jani SDO (C) aro BDO-rangni hukumo pangchake kuliskana gita man·gen ineba hukumo janapataha.
Indake ong·engon, a·jani BDO-rang Bajar Committee aro COVID Management Committee-rang baksa bajar-antirangko kuliani somoio covid sabisioniko champengna gita dingtang dingtang chol ba niamrangko ra·gatani bidingo manderangna u·i-ma·siatchengskagen.
Uandake, COVID-19 sabisioni an·tangtangko naljoke rakkina gita bajar-antidamrango mikkango mask-rang ganjringna, social distance (sakgipinoni chel·tanggrike) rakkina aro jakrangko rongtalatjringani (hand hygiene) aro uandakgipa niamrangko ja·nikna nanggen ineba district magistrate-ni hukumo janapaha.
