GHADC-o kam ka·giparangna dormaharangko on·anio dakchakaniko on·na CM ku·rachaka

TURA: Garo Hills Autonomous District Council (GHADC)-o kam ka·enggiparangni man·na nangkuenggipa dormaharangko on·na gita NPP-chi dilenggipa Garo Hills Democratic Coalition (GHDC) executive committee rakbee kamrangko ka·enga ine Sombar salo, Meghalaya a·dokni Chief Minister Conrad K Sangma parakatenba, GHADC-o kam ka·enggiparangna dormaharangko on·na kam ka·anio a·dok sorkari pilak nanga dakchakanirangko on·gen ine ku·rachakaniko on·ataha.

Chief Minister-ni u·iatani gitade, Sombar salo GHADC-ni gital chief executive membor (CEM) Benedic R Marak aro GHADC-ni secretary Rikse R Marak, uko gronge GHADC-ni nangchongmotenggipa kamrang, jekai GHADC-o tangka paisani gita neng·nikani, kamrangko namdapatani, GHADC-o kam ka·enggiparangna bangki dormaharangko on·ani aro uandakgipa dingtang dingtang kamrangni bidingo agangrikaha aro ua GHADC-ko tangatpilna man·na gita pilak nanga dakchakanirangko on·na ku·rachakaniko on·ataha.

“Dingtang dingtang cholrangko sandie GHADC-ni chief executive membor, gital Executive Committee (EC)-ona ra·ange chanchirimgen aro gital EC ra·chakahaon sorkarina proposal-ko ra·bagen. Ia proposal-rangko chinga Cabinet-ni gitaba nipiltaigen aro je proposal-rangkon chinga Cabinet-ni gita ra·chakna man·gen, ua pilakkon chinga nie ra·chakanggen,” ine Chief Minister aganenba, GHADC-ni proposal-o kam ka·enggiparangna bangki dongkuenggipa dormaharangko on·ani giminba janapgen aro dormaharangko on·na gita sorkari, bil ama gita dakchake on·anggen ine ku·rachakaniko on·ataha.

GHADC-ko tangatpiltaina gita kamrangko ka·enga ine gital CEM aro GHADC-ni secretary-ko mittelpilangengon, uamangni jotton ka·anichi kamrangko chu·sokgipa ong·atna man·gen ine Chief Minister, an·tangni ka·dongchakenganiko parakataha.

GHADC-o chagrongna nangenggipa dingtang dingtang neng·nikanirangko namatna man·na gita GHADC-o kam ka·enggiparangko aro dingtang dingtang dolrangko gital executive committee baksa bakrimchina gitaba Chief Minister mol·molataha.

“GHADC-o chagrongna nangenggipa neng·nikanirangko an·ching pilak dolrangan aro kam ka·enggiparangan bakrimanichisa namatna man·gen,” ine Sangma parakataha.

Get real time updates directly on your device, subscribe now.

Comments are closed.