Sam man·soa tapan bilsi 18 batgiparangko Covid tika su·gen: Dy CM

SHILLONG: A·dokona Covid tika sokbaa joljolan Sorkari, bilsi 18 batgiparangko Covid tika su·aniko a·bachengataignok ine Meghalaya Sorkari talataniko on·angaha.
Indakeba nikatna man·a je, Sorkari, a·song gimikon bilsi 18 batgiparangko Covid tika su·engaha, indiba Meghalayao Covid tikarangko Serum Institute-oni watatako sengengani gimin a·bachengatna man·kujaenga.
Deputy Chief Minister Prestone Tynsong-ni parakani gitade, tika su·na gita bimingrangkode segatengaha aro Covid tikarangko sokatani gimin Ma·mong Sorkari aro sam bijirangko tarienggipa industry-rang baksa agangrikanirangkoba dakaha.
Indake ong·engon, nangao man·na gita a·songo chu·onga gita tik dake donchina gitaba a·dok, ma·mongko mol·mlataha ineba Deputy Chief minister aganaha.
Bilsi 18 batgipa, Covid tika suna nanggipa manderang Meghalayao lak 15-na baten donga, jenan sam bijirangko brena gita sorkarina kror 90 mang tangkarangko nanggen ine Chief Minister Conrad Sangma unaskang aganahachim.

Get real time updates directly on your device, subscribe now.

Comments are closed.