SHILLONG: Meghalaya a·doko COVID-19-ni giproroaniko champengna gita sorkari name kam ka·jaenga ine Rangsakona-ni Congress MLA Zenith M Sangma matnangatenba, mikkangchiba apsan daken a·doko COVID giprorangkugenchimode obostarang namjabataona sokgnok ine an·tangni suk ong·gijaniko parakataha.
“An·chingo iandaken sabisi giproroangkugenchimode aro sabisini giproroaniko champengna man·jahaode, manderangni janggiko chel·chakna aro sabisini giproroaniko champengna gita lockdown-ko ra·gattaina nangao ga·akgnok,” ine Sangma parakataha.
Sombar salo, Zenith an·tangni jikgipa baksa skanggipa tikako Shillong civil hospital-o su·e ra·eani ja·mano ia kattarangko parakataha.
Zenith-ni parakatani gitade, badiaba badiaba biaprangko containment zone dakatna nangengoba sorkari niamrangko rakbatatna nangengachim.
COVID-19-ni gnigipa changna giproroaniko champengsona gita a·dok sorkari tarisamsoanirango namen olgrokaha ineba Congress dolni dilgipa, an·tangni suk ong·gijaniko parakataha.
“Maiba a·selrang ong·ahaosa sorkari, chanchirime ja·kuko de·na a·bachengronga. Uni giminsa anga a·bachengonin ja·kurangko de·samsona nangani gimin aganrongachim maina a·selrang ong·na skangan ja·kurangko de·samsogenchimode an·ching manderangna naljokaniko on·na man·a. Indake ong·genchimoba an·chingo ong·enga obostarangko nigenchimode an·ching maming tarisamsoanirang dongja ine nikna man·a,” ine Sangma aganaha.
COVID-ni tikako su·e ra·china gita a·dokni manderangko didiangengon, da·o gnigipa changna giproroenggipa sabisi namen kenbegnigipa ong·ani gimin manderang an·tangtangna namen simsakna nangenga ine Sangma parakataha.
COVID-ni giproroaniko sorkari name nirokjaenga ine Zenith matnanga
Date:
Share post: