TURA: South Garo Hills a·jao bang·a skulrangkon taripile on·anirang dongjaengani a·sel poraienggipa chatro chatrirang neng·nikanirangko chagrongna nangtokenga ine Mongolbar salo, Garo Students Union (GSU) Mindikgre regional unit-ni president Greneth M Sangma parakatenba, iani bidingo FIR ka·dona gita ka·mikkenataniko on·angaha.
GSU Mindikgre unit-ni president Greneth Sangma-ni parakatani gitade, South Garo Hills a·jani bang·bata skul nokrangan obosta namsrangjaengahani gimin changni chang education department-na u·iatahaoba da·alonan maming ja·ku de·anirang dongkujaengachim aro uandaken da·o gita wachini somoirangode bang·bata skulrangan class-rangko ra·na man·rongjaengachim.
South Garo Hills a·jao donggipa skul nokrangni bidingo toe janapatengon, re·anggipa bilsini March jao mikka balwa baksana stilrangni jimbee ga·akangani somoion Balkam Asim Deficit UP School nokko nosto ka·angaha aro ia skul nokko taripile on·china gita education department-na aro sorkarinaba sedoatahachim indiba da·alonan ia skul nokko taripile on·na dongkujaenga ine Sangma parakataha.
Ia jolrango iandake nosto ong·gimin gipin skul nokrang bang·en donga aro ia skul nokrangko taripile on·china memorandum-rangko on·manahachim ineba GSU-ni president parakataha.
“Chinga Garo Songgital Govt LP School, Rompa Asim Govt LP School, Dokgre Govt LP School, Banganggre Govt LP School, Mindikgre Adhoc Secondary School aro Balkal Asim Govt Deficit UP School nokrangko taripile on·china memorandum-rangko sorkarina on·atmanahachim indiba da·alonan ia skulrangko taripile on·na dongkujaenga,” ine Sangma parakataha.
South Garo Hills a·jani Education department-na sanction ka·gimin scheme-rangko sorkari den·galpilaha ineba Sangma, an·tangni suk ong·gijaniko parakataha.
Sianggimin ba kamoni neng·takgimin skigiparangni biapo gital skigiparangko on·kujaengani a·selan badiaba badiaba skulrangode skigipa gri ong·na nangenga ineba GSU Mindikgre unit-ni president parakataha.