TURA: West Garo Hills a·jani Galwang chiringo rikgipa Jakmiwari dam-oniko South West Garo Hills a·jani Ampati-ona chi salangenganiko Selsella jolo songdongenggipa manderangba raken jegalataha.
Sadolpara aro Chibokgre jolo donggipa Galwang chiringoniko, jolni manderangna u·iatchenggija Ampati-ona salangenga ine adita salrangna skangsan Babadam-ni Garoland State Movement Committee (GSMC)-ba matnangatahachim ine nikna man·a.
Indake ong·engon, All Selsella Joint Action Committee Greater Water Supply Scheme-ba iani bidingo PHE North Division-ni Executive Engineer-na sedoate, ia Jakmiwari dam-oniko Ampati-ona chi salaniko dontongatpilchina dabiangtokaha.
Committee-ni u·iatani gitade, ia Jakmiwari dam-ko Selsella-o songdongenggipa manderangna chiko sale on·na gitasa miksonge rikahachim indiba ia dam-oniko jolni manderangna maming u·iatchengani gri Ampati-onaba inch 15 ong·gipa siltongo salangskaengachim.
“Iandake niam gri Ampati-ona chi salaniko chinga raken jegalenga aro chi salaniko dontongatpilchina dabienga. Ia Galwang chiringo rikgipa Jakmiwari dam-ko Greater Selsella Water Supply Scheme-ni ning·osa rikaha aro chinga maming dakeba ia apsan chiringni ka·ma ba kosakoniko gipin biapona salna on·jawa,” ine committee-ni dilgiparang parakataha.
Galwang chiringoniko Ampati-ona chi salaniko Selsella-ni manderangba jegala
Date:
Share post: