SHILLONG: Meghalaya a·doko ta·rakbee COVID-19 giproroengon, Mongolbar salsani gisepon a·dok gimiko sak 339 manderang ia sabisiko man·dapaha.
Mongolbar salo sak 339 manderang COVID-19-ko man·dapahaon, sak 204 manderangde ia apsan salon ia sabisioni nampilskana gita man·aha.
Re·anggipa Robibar salosan Meghalaya a·dok sak 321 manderang ia COVID-19-ko man·dapahachim indiba Mongolbar salo sak 339 manderang man·skae ia salon COVID-ko man·giparang batangskaaha.
Health official-rangni u·iatani gitade, Mongolbar salo COVID-19-ko man·dapgipa sak 339 manderangko channe da·o a·dok gimiko COVID-19-ko man·e dongenggiparang gimik sak 2019 gapengaha. Mongolbar salo sak 204 manderang ia COVID-19-oni nampilahani gimin da·o a·dok gimiko ia sabisioni nampilgiparangba gimik sak 15810 gapskaengaha.
Meghalaya a·dok gimiko COVID-19 man·e dongenggipa gimik sak 2019-oni sak 1298-de East Khasi Hills a·jao, sak 201-de Ri Bhoi a·jao, sak 97-de West Jaintia Hills-o, sak 85-de East Jaintia Hills-o, sak 155-de West Garo Hills-o, sak 69-de West Khasi Hills-o, sak 25-de South West Khasi Hills-o, sak 19-de South Garo Hills-o, sak 30-de East Garo Hills-o, sak 22-de South West Garo Hills-o aro sak 18-de North Garo Hills a·jao ong·enga.