Meghalayao COVID sagiparang sakdok siangtaia

SHILLONG: Meghalayao ia ja mangmangon Covid man·e salprako mande sakdok siani ian chang baksade gittamgipa chang ong·engaha, jeon ia jani skanggipa anti mangmangon COVID man·e sianggiparang sak 28 gapengaha, aro COVID man·giparangba sak 2,000 batangpilaha.
Mijal Sukrobar salni bako sak 297 manderang COVID man·dapaha, uamangoni East Khasi Hills-o sak 180, Ri Bhoio sak 58, West Garo Hills-o sak 22, West Jaintia Hills-o sak 10, South West Garo Hills-o sak 9, West Khasi Hills-o sak 5, North Garo Hills-o sak 4, East Garo Hills-o sak 4, East Jaintia Hills-o sak 3, South West Khasi Hills-o sak 1 aro South Garo Hills-o sak 1.
Unomitingo gipin sak 176 manderang COVID-oni nampilskaaha, uamangoni East Khasi Hills-o sak 146, Ri Bhoio sak 11, West Garo Hills-o sak 7, East Jaintia Hills-o sak 5, West Jaintia Hills-o sak 4 aro West Khasi Hills-o sak 13 manderang sabisioni nampilaha.
Sukrobaro sakdok sianggiparang gimikan East Khasi Hills district-oni ong·a.
COVID-19 sabisiko man·giparang Meghalayao gimikchide sak 18,927 ong·ahachim, uamangoni sak 16,262 manderang sabisioni nampilaha, sak 199 siangaha, indake COVID man·enggiparang a·doko da·o sak 2,466 dongengkua.