Tura covid man·e sia sakgni ong·engjok

TURA: Ia bilsini gisepo a·song gimiko aro Meghalaya a·doko changsatai covid-19 sabisi jelbatrikriktaiengon, Tura Civil Hospital-o mejal Sonibar salo gnigipa changna signigipa aro saksa sakgipino batrikrikenggipa covid-19 sabisi man·e siangako niktaina gita man·aha.
Mejal Sonibaro sabisini a·sel sianggipa bilsi 71-ni budepa saksara, Tura Walbakgre gittimoni ong·achim, ua adita salrangna skangon covid sabisi man·ahachim aro uni ok re·e saa biljimahaosa uko mejalo Tura Civil Hospital-ni Covid ward-ona sana bananiko dakna rimbaskaaha.
U·i-ma·sigiparangni agan-ku·balsoa gita ia sal somoirango a·song gimiko covid-19 sabisi man·gipa manderang bang·bataon sabisini chinko nikrongna gita man·engon, mejalo sabini a·sel sianggipa Tura Walbakgre-ni budepa saksaba ok chika aro ok re·a biljimani a·selsa janggi galna nangahachim ineba koboro u·iataha.
Sianggipa budepako hospital-chi rimbaani joljolan covid sabisina positive man·aha ine u·iaha aro ua hospital-ona sokbaani kontasa ja·manon jojol a·gilsakko watangna nangao ga·akaha.
“Ua skangonin rang·sitna neng·e saani (asthma) dongachim, indiba uni be·eno skangoni saa donggenchimoba, mejalo uni tanggitik siangani a·selde ua agrepile ok re·ani giminsa ong·a. Maina ua covid sabisina positive man·ahachim,” ine West Garo Hills-ni Deputy Commissioner Ram Singh, ong·chongmotgipa koborko parakataha.
Indake ong·engon, sabisini a·sel sianggipa budepako, sorkarini didiatgimin covid sabisini niamrangko ja·rike mejalon sabisi man·e sianggipa manderangko gopna tarisogimin gopramo gopskaaha.
Adita salna skang, chong·motan re·anggipa Mongolbar salo mangmangsan sianggipa Garo Baptist Convention-ni general secretary, Rev. Krickwin Marak sagiba apsan sabisiko man·e siangchenggipa ong·aha. Ukoba apsan sabisini man·e saa biljimani ja·manosa hospital-o sana-bananiko dakna ine Tura Civil Hospital-ona rimbaahachim.