SHILLONG: COVID-19 ta·rakbee giproroengmiting somoio, Assam a·dokni gital chief minister Himanta Biswa Sarma-ni ku·mikchetaniona re·ange bakko ra·eahani gimin Meghalaya a·dokni Chief Minister Conrad K Sangma-ko a·dokni Opposition Congress dol matnangataha.
Assam a·dokni gital chief minister-na seokako man·ani ja·man Himanta Biswa Sarma, re·anggipa Sombar salo jinmani mikkango ku·mikchetaniko dakangahachim aro uni ku·mikchetaniko dakaniona Meghalaya a·dokni Chief Minister Conrad Sangma-ba okamatako man·e bakko ra·eahachim.
Indake ong·engon, Assam a·doko aro Meghalaya a·dokoba COVID-19 ta·rakbee giproroengmiting somoio chief minister-ni Assam-ona re·anganiara namen kragijani ong·aha aro da·o chief minister-ba Assam-oni re·bapile ramram manderang gitan quarantine dakna nanggnok ine Congress dolni MLA Ampareen Lyngdoh parakataha.
“Assam-oni re·bapilahaon a·dokni chief minister-ba dongimin niamko ja·rikna nanggen aro ua komibeoba salbongana dingtang nape dongani ja·man porikka ra·e nina nanggen,” ine Lyngdoh parakataha.
Indake ong·genchimoba, a·dokni Health Minister AL Hek, chief minister-na chakpaaniko parakatskaaha aro ua tika ponggnikon ra·manaha ine talatangaha.
“Chief minister tika ponggnikon ra·manahani gimin niamo pangchake quarantine dakna nangjawaha aro porikkako ra·na nangjawa,” ine Health Minister parakataha.
Chief Minister baksa Guwahati-ona re·angpagipa gipin official-rangni gimin sing·on, uamang tika ponggniko ra·kuja ong·ode niamo pangchake quarantine dakna nanggen ine Health Minister parakataha.
Chief Minister an·tangba an·tangni kosako matnanganirangna talataniko on·angaha aro dongimin niamde pilaknan ong·a ine parakataha.
“Tikako su·oba su·jaoba an·ching simsakna nangaia aro je somoioba je mandeba COVID-ko man·na amaia. An·ching pilakan mask-rangko ganjringe aro jakrangko rongtalatjringe an·tangtangko naljoke rakkina,” ine Chief Minister, social media-o parakataha.