SHILLONG: Meghalaya a·doko Special Force (SF-10)-ni sipairangko nambate nirok sandina man·na gita aro sipairangko dingtang dingtang kamrango nambate jakkalna man·na gita sak 1,387-oni sak 905-ona komiatpilna proposal on·aniko Mongolbar salo a·dokni Cabinet ra·chakangaha.
Iani bidingo kobor ra·timgiparang baksa agangrikengon, SF-10 sipairangko nambate nirok sandina aro nambate jakkalna man·na gita sorkari, SF-10 sipai dolko taridapna gita nangnikaha ine a·dokni Home Minister Lahkmen Rymbui parakataha.
Home Minister-ni parakatani gitade, sak 905 sipairangkode SF-10 dolo donkugen aro gipinrangkode obostani kri dingtang dingtang a·jarango ba outpost-rangona rimange jakkalangskagen.
Meghalaya a·doko bobil dake chakatgipa dolrangko warachakna miksonganiosa SF-10 sipai dolko bikotahachim indiba da·o a·doko bobil dake chakatgipa dolrang komiangahani gimin SF-10-ni sipairangko komiatna gita Home department, Cabinet-na proposal-ko on·ahachim.
Indake ong·engon, SF-10-o dongkuenggipa sak 905 sipairangoni, sak 183-kode SF-10 headquarter-o dongen, sak 361-kode 1st MLP Battalion Mawiong-o kulina sienggipa eastern range tactical base-o dongen aro sak 361-kode 2nd MLP Battalion-o kulina sienggipa western range tactical base-o donskagen ineba Home Minister parakataha.