TURA: South Garo Hills a·jani Chokpot sub-division-ni ning·o donggipa Silkigre joloniko Budbar salo, bregimin me·chik saksani sogimin manggisiko man·aha ine kobor on·aha.
Koborko on·ani gitade, ia me·chikni manggisiko Silkigre police outpost-ni ning·o donggipa Tebisokgre songni manderang, chiring sambaoniko nikenba ja·mano police-rangna kobor on·ataha.
Ia me·chikni manggisi maming gana gri china gri ong·ani gimin ia me·chikko so·ote galna skang drae til·ekahakon ine police-rang, an·tangtangni chanchichipenganiko parakataha.
South Garo Hills a·jani Superintendent of Police (SP) Rituraj Ravi-ni u·iatani gitade, ia manggisini bidingo songni manderang, police-rangna u·iata bakan police-rang ua biapona re·ange, ja·mano manggisiko post mortem-na on·ataha.
“Ia me·chikni manggisio uni skoba grichim aro uni chola ba·rarangba dongjani gimin ia me·chikko drae til·ekani ja·man so·ote galakon chinga chanchichipenga,” ine South Garo Hills a·jani SP parakataha.
Ia a·selni bidingo police-rang ning·tue sandianirangko dakna a·bachengaha ineba SP parakataha.