TURA: Budbar salo gimik sak 70 manderang West Garo Hills a·jao COVID-19-ko man·dapaha ine kobor on·aha.
West Garo Hills a·jani Deputy Commissioner Ram Singh-ni u·iatani gitade, Budbar salsani gisepon West Garo Hills a·ja gimiko sak 70 manderang, COVID-19 positive ong·dapaha aro uandaken da·o West Garo Hills a·jao COVID-19 man·e dongenggiparang gimik sak 356 gapengaha ineba Singh parakataha.
Budbar salo sak 3 manderang ia COVID-19-oni nampilna gita man·skaaha aro uandaken da·o West Garo Hills a·jao COVID-19-oni nampilgiparang gimik sak 168 gapskaengaha ine Deputy Commissioner u·iataha.
Indake ong·engon, West Garo Hills a·jao COVID-19-ko man·giparang batrorobaengani gimin dokkan aro office-rangko kuliani somoirang baksana night curfew-ko ong·atani somoirangkoba taridapgen ine Deputy Commissioner u·iataha.
Assam-oni Tura Bazar-ona re·baenggipa garirangko Damalgre-o porikka ra·e nianggnok ineba Deputy Commissioner u·iataha.