TURA: Ja·manchake koborko man·soani gitade, re·anggipa Budbar salo West Garo Hills a·jani a·kawe jolo donggipa Phulbari bazar-o manderang COVID-19-na dongimin niamrangko pe·ani gimin official-rang aro police-rang ua biapona re·ange manderangko noktangtangchi watpilatna jotton ka·on, manderang jinma ka·a ding·chaoe police-rangko ro·ongrangchi gona a·bachengaha aro uandaken ia a·sel ong·anio mande sakgittam saknaanirangko man·aha aro ro·ong goanichi dokkan ge·sa nosto ong·atako man·aha.
Kobor on·timgiparangni u·iatani gitade, COVID-19-ni giproroaniko champengna dokkanrangko skatang kulijachina aro manderangko jinma bazar anti cha·jachina beng·ahaoba Budbar pringo Phulbari bazar-o dokkan dakgiparang dokkanrangko kulina a·bachengaha aro manderang jinma bazar cha·na a·bachengahachim. Manderangni iandake niamko manigija dokkanrangko kuliengani gimin aro manderang jinma bazar anti cha·engani gimin police-rang, magistrate aro block development officer baksa ua biapona re·ange dokkanrangko chipchina aro manderangko noktangtangchi re·angchina aganon, manderang rang·san ka·a ding·chaoe police-rangko aro official-rang chadrapna a·bachengaha aro ro·ongrangko goaha. Ro·ongrangko goanichi mande sakgittam saknaanirangko man·aha aro dokkan ge·sa adita nosto ka·ako man·aha ine kobor on·aha.
Indake ong·genchimoba, ja·mano ua biapona police-rang watdapataha aro manderangko katatna gita man·aha. Ia a·selni bidingo FIR-koba ka·aha ine kobor on·aha.
Phulbari bazar-o adita sak manderangko COVID-19-na porikka ra·anio positive ong·ahani gimin Phulbari bazar jolrangko containment zone dakatahachim indiba ja·mano ia jolrangko containment zone dakataniko district administration ra·galpilahachim ine nikna man·a.