SHILLONG: Meghalayao COVID-19 sabisiko man·e sianggiparang salsabatbat batrikrikengon, Shillongo sigipa sakantiko gopani daitoba goptimgiparangna baljrimrorobatenga.
Bang·bata manderangan sabisi batna kenenba COVID man·e sigipa manggisini sepangona mangba re·na kentokengon, kena sin·ako minggija COVID-ko mikkangchake kam ka·giparangba dongskaa aro COVID man·e sianggiparangba pilakan mandera·e gopako man·na nanga ingipao sianggipa manderangko mandera·e gopenga.
Solid waste management, Shillong Municipal Board-ni assistant manager Maskal Lyngdoh, uamangni chagronggipa obostarangko aganengachim je gipinrang gita daken, ua aro uni dolni manderang COVID man·e sigiparangko gopani kamko jako ra·anio basakobade namen kena indiba uamang man·a dipete simsakanirangko daka, ua aganaha.
“Chingni dolo sak 10 memborrang donga aro COVID sae sianggipa manggisirangko gopengon, naljokaniko man·na gita chinga pilakan PPE, mask, glove-rangko gantoka,” ua aganaha.
Maskal aro uni dolni manderangni kamara, COVID sae sianggipa manggisirangko Songjinmani dingtangtang hospitalrangoniko ra·ongkatenba dingtang dingtang goprango gopani aro electric-chi so·ram biaprango so·ani ong·achim.
Maskel aro uni dol, da·o dipet sak 100-ni manggisirangko jakdangdikaha aro da·o sigiparang salantian dongroroenga.
“Sigipa bang·ode chinga dolko suala, manggisiko gopani aro so·ani ja·manode an·tangtangko namedake sanitize ka·a” ine ua aganaha, COVID sabisi ta·rake chel·anggen ine ka·dongenga aro bi·enga ineba Maskel aganaha.
A·doko COVID sae sianggiparang East Khasi Hills district-on bang·batenga ineba nikatna man·a.
Shillong Eletric Crematorium ba mande so·chakramko chalaigipa Prakash Sunar indake aganaha je ua aro uni dol, manggisirangko so·na ra·baon pilak protocolrangko ja·rikenga.
“Manggisi sokbaenga ine ma·sisoon chinga pringonin kamrangko ka·soa aro basakoba salo saksa aro basakobade salon sakgnirangko so·na ga·aka” ineba ua aganaha.
“Chingo kenanide donga indiba chinga ia kamko ka·nana ga·aka aro minggipinara ia rakbegipa obostao ian mingsa mande jatna dakchakna gita mingsa cholba ong·taia,” unomitongo, sorkari da·alona kingkingba chingni bill-rangko matchote on·kuja ineba ua agandapaha.
Mawprem Muslim Gopramni vice president Md Zakaria-ni aganani gitade, Shillongo uamang jatoni da·o dipetode sakgnisan siengkua, uamang sakgnikon Mawprem gopramon gopaha.
