SHILLONG: Dam 56 sub-station-rangko chalaina aro jako ra·na gita Broadcasting Engineering Consultants Corporation Limited (BECIL)-na LoA on·aniko ra·galpilchina gita Opposition chief whip PT Sawkmie, Meghalaya Sorkariko aganaha.
MDA-o bakrimgiparangba bang·an namniktokjaengani gimin BECIL baksa tik ka·giminko Sorkari ra·galpilna nanga ineba Sawkmie, Robibaro aganaha.
Iani mamlao ku·rang on·tokchina gita UDP, PDF aro HSPDP Minister-rangko didiengon, a·palchini company-na LoA on·ako NGO-rang, Congress legislator-rang aro MDA-ni bakrimgipa pilakan jegaltokenga ineba Opposition Chief whip aganaha.
‘‘A·doktangni contractors ba tikka ra·e kam ka·giparangan, uamangni kamrangko gimaatna nangengani gimin chinga suk ong·ja aro ia company-de a·joltangni manderangkode kamoba rakkijawa,’’ Sawkmie aganaha.
Unaskang, dam 56 sub-station-rangko chalaina aro jako ra·na gita M/S Broadcasting Engineering Consultants Corporation Limited (BECIL)-na on·gipa letter of award (LoA)-ko Sorkari ra·galpilna ja·manchakode jingjengatgen ine Khasi Students Union (KSU), Federation of Khasi Jaintia and Garo People (FKJGP), Hynniewtrep National Youth Front (HNYF) aro Ri Bhoi Youth Federation (RBYF) ia dolbri pressure group-rang ka·mikkenatahachim ineba nikna man·a.
Unbaksana kamko jako ra·jachina gitaba uamang Noida-ni company-ko aganahachim.
Unomitingo ia kamrangko nirokatchina gita janape seenba NGO-rang re·anggipa antio kingsa memorandum-ko Chief Minister Conrad K Sangma-na on·aha.
