SHILLONG: Assam aro Meghalaya a·dok damgnion COVID-19 ta·rakbee giproroengani gimin Mongolbar salo Meghalaya aro Assam a·dokni chief minister-rang, video conference-ko ong·ate internet gita agangrikangenba, nanggitikan somoirango dakchakgrikna ku·rachakgrikangaha.
Badiaba somoirangode Meghalaya a·doko oxygen-rang chu·ongjaengani gimin nangan somoirango oxygen-rangko Meghalaya a·dokna on·e dakchakna Assam-ni Chief Minister Himanta Biswa Sarma, ia tom·anio ku·rachakangaha aro iana Meghalaya a·dokni Chief Minister Conrad K Sangma, Assam sorkariko mittelpilangaha.
COVID-19-ni giproroanichi Meghalaya a·doko pilak nanganirangko on·e dakchakangkuchina gitaba Meghalaya a·dokni Chief Minister, Assam sorkariko didiataha aro Assam-ni Chief Minister-ba Meghalaya sorkarina pilak nanga dakchakanirangko on·na ku·rachakangaha.
Meghalaya a·doko lockdown-ko ra·gatengmiting somoio nangchongmotgipa bosturangko salbaenggipa Assam-ni garirang neng·nikanirangko chagrongna nangrongani gimin ia tom·anio Assam-ni chief minister, Meghalaya sorkariko nirokatchina didiangon, Assam-oni nangchongmotgipa bosturangko salbaenggipa garirangna maming nangchakeani dongjawa aro maming neng·nikani grian re·rurana man·aigen ine Conrad, ku·rachakaniko on·angaha.
India a·songni salgro salaram a·dokrangna oxygen-rangko suale on·skana man·na gita Assam a·dokko centre dakchina Assam sorkarini ma·mong sorkario bi·atgipani bidingo chanchirimangengon, Meghalaya sorkarikoba iano bakrimchina Assam-ni chief minister didiataha.
Indake ong·engon, Assam sorkari Meghalaya a·dokna pong 100 Covaxin tikarangko aro D Type Cylinder-rangko on·e dakchakna ku·rachakataha ine Meghalaya a·dokni Chief Minister Conrad K Sangma parakataha.
