TURA: West Garo Hills a·jani Jengjal jolo donggipa Baljek-o kulina sienggipa Cryogenic Oxygen Plant-ko Bristibar attamchibara, a·dokni Chief Minister Conrad K Sangma niangaha.
Ia oxygen plant-ko niangani ja·man kobor ra·timgiparang baksa agangrikengon, Jengjal-o Cryogenic Oxygen Plant-ko rikna gita da·o a·arangko apsan ong·atenga aro gipin kamrangkoba ka·engaha ine Chief Minister parakataha.
Anti gittamni gisepon cryogenic tank-rangko ra·bana gita official-rang rake kamko ka·enga ineba ua ia biapko niangani ja·man parakataha.
Jengjal-o rikenggipa Cryogenic Oxygen Plant-ko rikmanahaode ia oxygen plant-oniko Garo Hills-ni dambonga a·jarang baksana West Khasi Hills a·jani mitam biaprangnaba oxygen-rangko suale on·gnok ineba Chief Minister parakataha.
“Ia biapo oxygen plant-ko kulianichi Garo Hills-ni dambonga a·jarangna aro West Khasi Hills a·janaba oxygen-rangko on·na man·gnok. Ian mongsonggipa biap ong·ani gimin ia biapo oxygen plant-ko kulianiara pilaknan namgni ong·gen,” ine Bristibar attamo Chief Minister parakataha.
