SHILLONG: Sukrobar salsani gisepon Meghalaya a·dok gimiko sak 828 manderang COVID-19 man·dapaha aro ia apsan salon sak 25 manderang COVID-19-ni a·sel siangskaaha.
Sukrobar salo COVID-19 man·dapgipa sak 828 manderangko channe da·o Meghalaya a·dok gimiko COVID-19 man·e dongenggiparang gimik sak 6861 gapengaha aro COVID man·e sianggiparangara gimik sak 414 gapskaengaha.
Sukrobar salo positive ong·gipa sak 828 manderangoni sak 19-de East Garo Hills-o, sak 27-de East Jaintia Hills-o, sak 392-de East Khasi Hills-o, sak 19-de North Garo Hills-o, sak 170-de Ri Bhoi a·jao, sak 9-de South Garo Hills-o, sak 35-de South West Garo Hills-o, sak 7-de South West Khasi Hills-o, sak 59-de West Garo Hills-o, sak 79-de West Jaintia Hills-o aro sak 12-de West Khasi Hills a·jao ong·a.
Sukrobar salo COVID man·e sianggipa sak 25 manderangoni sak 15-de East Khasi Hills-o, sak 1-de West Garo Hills-o, sak 6-de West Jaintia Hills-o, sak 1-de East Jaintia Hills-o, sak 1-de North Garo Hills-o aro sak 1-de West Khasi Hills a·jao ong·skaa.
Ia apsan salon gimik sak 419 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 20480 gapskaengaha.