TURA: South West Garo Hills a·jani Rerapara block-o COVID-19-ni obostarangko ma·sie ra·na gita Sukrobar salo Rangsakona-ni Congress MLA Zenith M Sangma, COVID management & monitoring committee baksa tom·aniko ong·atangaha aro ia tom·anio Rerapara Block-ni BDO, membor secretary, dingtang dingtang police station-ni officer-rang aro dingtang dingtang PHC-ni doctor-rangba dongpae bak ra·angaha.
Ia tom·anio Rangsakona-ni MLA, tom·anio bak ra·giparang baksa apsan chanchirimangengon, COVID-19-ko warachakna gita an·tangtangni janggirangko on·kange kam ka·enggipa pilak manderangkon mittelpilangaha.
South West Garo Hills a·jao COVID-19-ko warachakna gita chu·onga gita cholrang, hospital-rango palangrang aro COVID-ni tikarang chu·ongjaengani giminba ia tom·anio jinma chanchirimangaha.
South West Garo Hills a·jao COVID-ko warachakna gita chu·onga gita cholrang dongjaengani gimin an·tangni suk ong·gijaniko parakatengon, South West Garo Hills a·ja gimikon da·o dipet oxygen donggipa palangrang ge 9-san dongkuenga aro ianoni ge 6-de manderang dongengaha ine Sangma parakataha.
Songo noko donggipa manderangko skatang doka sata dakjachina indiba nama bewalchi manderangko agan-skie on·china gita ua police officer-rangkoba didiangaha.
Epidemic Diseases Act 1897 aro Disaster Management Act 2005-ni ning·o niamrangko on·manahaoba a·dok sorkari, iandake sabisirang giproroengmiting somoirango manderangna nangchongmotgipa bosturangko suale on·jaenga ineba Sangma, an·tangni suk ong·gijaniko parakataha.
Tom·a matchotani ja·mano Rangsakona-ni MLA, containment zone dakenggipa Asinagre songkoba re·ange niangjolaha aro ja·mano Asinagre aro Dolbari songni manderangna mirong, dal,sabon aro do·chirangko suale on·angaha.
