SHILLONG: Meghalaya a·dokona COVID-19 sokbachengaoni a·dok sorkari, COVID-19-ni giproroaniko champengna kam ka·anio chang lak 5-na baten COVID-19-na porikkarangko ra·e niaha.
Batanggimin konta 24-ni gisepo India a·song gimiko lak 21.23 test-rangko ka·e salsano bang·bate porikka ra·e niani ong·aha aro India a·songo lak 20-na bate porikka ra·aniba joljol bongagipa sal gapaha.
Meghalaya sorkarini see rakkianiko parakatani gitade, da·o dipet Meghalaya a·doko 1,61,057 RTPCR test-rang, 11326 CBNAAT test-rang, 20771 TRUENAT test-rang aro 3,43,751 antigen test-rangko man·chape gimik 5,36,905 test-rangko ka·aha.
Meghalaya a·dok gimiko da·o dipet East Khasi Hills a·jao 2,14,214 test-rangko ka·e bang·batgipa ong·enga aro gipin a·jarangoba 1,27,923 test-rangko ka·skaaha.
Da·o dipet Meghalaya a·dok gimiko East Khasi Hills aro Ri Bhoi a·jarangon COVID man·e dongenggiparangoni bang·batgipa ong·enga ine nikna man·a.
COVID-19 gipna a·bachengaoni West Garo Hills a·jao chang 59,685 porikkarangko ra·e niaha aro South West Khasi Hills a·jao chang 5692 porikkarangko ra·e komibatgipa ong·skaenga.
East Jaintia Hills a·jaoba chang 28,917 porikkarangko ra·e niaha aro West Khasi Hills a·jaoba da·o dipet chang 20,955 test-rangko ra·skaaha.
Re·anggipa jani gisepon a·dok sorkari, porikka ra·e nianirangko baridapataha aro da·o dipet Meghalaya a·doko chang 90,926 sample-rangko porikka ra·e niangaha.