TURA: Garo Hills Autonomous District Council (GHADC)-o kam ka·enggiparangna ja 34-ni dormaharangko on·kujaengani gimin Non Gazetted Employees Association (NGEA)-ni gita kamrangko ka·gija jingjengatanirangko dakdilengon, GHADC-ni chief executive membor (CEM) Benedic R Marak, niam gri a·paloni manderangko GHADC-o kam ka·atenga aro office-ni file-rangko ma·sina man·gijagipa biaprangona ra·angenga ine matnangataha.
“GHADC-o kam ka·enggiparang bilsi gittam ong·na sipile dormaharangko man·tokjaengani gimin jingjengatanirangko dakengon, GHADC-ni gital CEM, niam gri a·palni manderangko rimbae GHADC office-o kamko ka·atskaenga. GHADC-de jinmani gamsa ong·a aro iano kam ka·giparangko seoknade dingtang dingtang niamrang donga. Mai niamo pangchake ua, a·palni manderangko GHADC-o security guard dake kamko ka·atenga,” ine NGEA sing·doangenba, CEM-ni kam ka·atenggipa security guard-rang mask-rangko gangijasa re·rurae dongenga aro COVID-ni niamrangko pe·enga ine matnangataha.
A·palni manderangko GHADC-o kam ka·ataniara niamni a·palo ong·a aro jegalaniko man·na krachongmota ine janapatengon, GHADC office-ni file-rangkoba ma·sina man·gijagipa biaprangona ra·angenga aro mikkangchi ia file-rang gimana nanggenchimode ba ra·bachippilja dongenchimode office-ni kamrango bang·a neng·nikanirangko chagrongna nangao ga·akgnok ine NGEA parakataha.
“”Ia file-rangko office-tangtangona sokatpiljagenchimode office-o see rakkigimin pilak data-rangan gimatokgnok. Ia file-rangko ra·ruraani bidingo maming see rakkianirang dongjani gimin mai ong·gen darangba aganna man·ja. Maibakae ia file-rang gimagenchimode ba sokbachippiljagenchimode sawa daiko ra·gen?” ine NGEA-ni dilgiparang sing·doangaha.
Indake ong·engon, GHADC-o kam ka·enggiparang kamrangko ka·pilkujawa aro executive committee-ni on·enggipa jabongani dormahako ra·chakjawa ine NGEA, state bank of India-ni branch manager-na sedoataha aro ia jabongani dormahana tangkarangko on·atjachina didiataha ineba NGEA parakataha.