SHILLONG: Meghalaya a·dokoba gnigipa changna COVID-19 giproroengani gimin COVID man·gipa manderangna dakchakaniko on·na miksonganio sorkari, Megha Health Insurance Scheme (MHIS)-ni ning·o man·gniko gong 60,000-ona bariatna manchiangaha.
Iani bidingo a·dok sorkari Bristibar salo tom·e chanchirimangenba, MHIS-ni ning·o man·gniko gong 4,900-oni gong 60,000-ona bariatna manchiangaha ine a·dokni Deputy Chief Minister Prestone Tynsong parakataha.
Tynsong-ni parakatani gitade, ia somoirango COVID man·gipa manderang batrorobaenganichi manderang neng·nikanirangko chagrongna nangtokengani gimin sabisi man·gipa manderangna dakchakaniko on·na man·na gita MHIS-ni ning·o man·gniko sorkari bariatna tik ka·aha.
Indake ong·engon, MHIS-ni ning·o biming segatgipa manderang a·doko komikuenga ineba Deputy Chief Minister, an·tangni suk ong·gijaniko parakataha.
“Meghalaya a·doko bang·bata manderangan ia scheme-na gisik nangbretokjaenga aro uandaken da·o dipet ia MHIS-o register ka·giparang 58.5 percent-san ong·engkua. Ia scheme-ara sagipa manderangko dakchakna sorkarini ra·gatgipa scheme-an ong·a, uni gimin manderang ia scheme-na an·tangtangko register ka·china anga mol·molenga,” ine Tynsong parakataha.