TURA: Garo Hills Autonomous District Council (GHADC)-o kam ka·enggiparang bilsi gittam ong·na sipile dormaharangko man·kujaengani gimin kamrangko ka·gija jingjengattokengon, uamangni nangnikaniko knachakgija kamrangko ka·tokengani gimin Bristibar salo, GHADC-ni officer-rangko uamangni kamoni noktangtangchi re·angpilengmiting somoio Non Gazetted Employees Association (NGEA)-ni membor-rang, ramao champengsona jotton ka·aha aro iana NGEA-ni membor-rangko GHADC-ni chief executive membor (CEM) Benedic R Marak, raken jegalataha.
Koborko on·ani gitade kam ka·e noktangtangchi re·angpilenggipa officer-rangko GHADC-o jingjengatenggipa manderang champengna jotton ka·aha aro ro·ongrangkoba goe gari bolsako nosto ka·aha.
CEM-ni re·angani ja·mano jingjengatenggipa manderang, office-oni re·angpilenggipa officer-rangko ramao champengsona jotton ka·aha aro ramao champengsoe officer-rangko gariko neng·takatchina aro garioni ong·katchina dabitokaha ine u·iataha.
Officer-rangni garirangko champengengmiting somoio Accounts branch-ni officer saksa, ramako salprue kataha aro jingjengatenggipa me·chik saksa saknaaniko man·na nangahani ja·mano ia officer-ni kosako NGEA, police-rangna badi ka·angaha.
Indake ong·engon, officer-rangko ramarango champengahani gimin GHADC-ni CEM suk ong·gijaniko parakatskaaha aro ia kamara namen kragijani ong·aha ine parakataha.
“Kam ka·enggiparangna dormaharangko on·na man·na gitasa officer-rang kamrangko ka·tokengachim indiba uamangni iandake kam ka·enggipa officer-rangko champenganiara namen kragijani ong·a. GHADC-o kamrangko ka·jaenga ong·ode maikai dormaharangko on·na man·gen?” ine GHADC-ni CEM, an·tangni suk ong·gijaniko parakataha.
GHADC-o kam ka·enggiparang gimik ja 34-ni dormaharangko man·na nangkuengoba da·o jabongani dormaharangkosan on·chengna manchiengani gimin kam ka·giparang ia jabongani dormaharangko ra·chakna jechaktokskaengachim aro komibeoba bilsisani dormaharangko gital pay scale-o on·china dabitokengachim ine nikna man·a.