SHILLONG: Meghalaya a·doko COVID-19-ko man·giparang batoroengani gimin a·dok sorkari, re·baenggipa May 30 tarik Robibar salni 12:00 bajio, a·dok gimikon jinma bi·rimaniko ong·atna manchiangaha.
A·dokni Health Minister AL Hek-ni u·iatani gitade, a·doko obostarang namjabatrorobaengani gimin jinma bi·rimaniko ong·atna chanchion a·dokni Chief Minister Conrad K Sangma-ba iako namnike ra·chakpaaha.
Ia jinma bi·rimanio je torom ba ma·malni manderangba ong·ja maina, pilakan noktangtango donge bakko ra·angna man·aigen ine Health Minister parakataha.
“COVID-19 man·e sianggiparangna an·ching jinma bi·na aro sabisi man·e dongenggiparangba ta·raken nampilchina an·ching Nokgipao bi·na,” ine Hek aganaha.
