Shillong: Dr Mukul Sangma-ni dilanio Sonibar salo zoom meeting-ko ong·ataha, jeon a·doko covid-ni obostao aro sorkarini pandemic-ko maidake warachakenga iarangni gimin chanchiangaha.
Uandake CLP tom·anio a·doko covid saa man·e sianggiparang batrikrikenga aro Shillong-o mongsongbate covid sagipa aro sianggiparang batengani gimin CLP jajrengako parakaha. Shillong-o covid-19 sabisi batrikrikani a·selara sorkarini covid sagiparangko noktango isolation ka·atengani gimin batrikrikenga unbaksana hospital-o covid sagiparangko sanna chu·onga gita facility dongja. Covid sagiparangko sanna gita sorkario chu·onga gita infrastructrue jekai- oxygen, ICU dongja, unbaksana ventilator-ko chalaina skia man·gipa staff-rangba dongja. Iarangna agreba a·doko covid care centre-ko songanio ru·utaha, indake covid hospital-ba dongja.
Indake ong·engon sorkari, pandemic-ni somoi mikkangchake kam ka·gipa Asha-rangkoba nichanga aro uamangni man·a nanggnikon sorkari on·kujaenga ine janapabenba, pandemic-ko National Disaster ine parakataonin covid sae sianggipa nokdangna sorkari gong 50,000 tangkako on·na ku·chakaha, ian namen komia, uni gimin salantion covid sae sianggiparangko disaster-ni bak channe National Disaster Management Act-ni niamo pangchake tangkako on·china dabiaha.
Minggipin CLP, sorkariko Community Isolation Centre-na chakpachinaba agan-ku·pattiaha. Sorkari ta·raken gipin district-rangoba health care facility-ko donchina aganaha. Uandake CLP, mikkang antioni district ge·antiona re·roroe Health facility centre-ko nirokena tik ka·aha.
