aTURA: COVID-19 man·e COVID ward-o sanna bananirangko ra·enggipa manderangko Budbar salo, Meghalaya a·dokni Chief Minister Conrad K Sangma grongeaha aro saenggipa manderangna agan-ku·pattianirang baksana ka·dongatani kattarangko aganangaha.
Chief Minister an·tangba Tura Civil Hospital-ni Covid Ward-ona re·angani somoio personal protective equipment (PPE)-ko gane, sagiparangko aro ua biapo kam ka·enggiparangko grongeaha aro PPE-ko gananio baditana kingking mande ding·ako aro neng·nikaniko chakna nangachim, uko ma·sie ja·mano doctor, nurse aro hospital-rango kam ka·enggiparangko iandake kamrangko ka·engani gimin mittelpilaniko parakangaha.
“Anga an·tangde dikdiksa PPE-ko ganon chaktokgijaniko man·aha indiba an·chingko nirokenggipa doctor, nurse aro gipin health worker-rangde salantian baditaba kontarangna iako gane kam ka·enga. Ian uamangni an·tangtangko on·kange kam ka·aniko mesokani ong·chongmota aro iana an·ching pilakan uamangko mittelpilna krachongmota,” ine Chief Minister, COVID ward-oni re·bapilani ja·man parakataha.
Tura Civil Hospital-ona re·angani somoio a·dokni Chief Minister, hospital aro COVID ward-o kam ka·enggipa nurse aro gipinrangkoba gronge agangrikangaha aro uamangni kamrangna mittelpilangaha.