SHILLONG: Jaintia Hills-ko man·chape a·dokni dingtang dingtang biaprango niamgri koela bikotanirangko rim·a man·engani gimin, niamgri koela bikotanirangko sandiatchina gita a·dok sorkari sin·jetako man·engon, jakgitele sandiataniko dakatani bidingo MDA sorkari chanchie nienga ine parakaha.
Unaksang, East Jaintia Hills-o niamgri koela bikotenba sakbonga manderangni gimaani ja·mano, Jaintia Hills, West Khasi Hills aro Garo Hills district-rango niam gri koela bikote palenganirangko, dingtang dingtang dake sandigipako donenba jakgitele sandiatchina gita Opposition Congress dabiahachim.
Chief Minister, Conrad Sangma Bristibaro agana je a·doko mamingkoba ong·gija kamko ka·na Sorkari chol on·jawa, aro iandakgipa ong·gija kam ka·anirangko champengna rakgipa niamrang donga.
“Niamni a·palo kam ka·giparangni kosako niamo pangchake bichal ka·gen aro niamni a·palo maming ong·gija dakanirang dongjana gita Sorkari nirokatgen,” Chief Minister aganaha.
East Jaintia Hills-ni koela a·kolo sakbonga kam ka·giparang gimaenga ine chanchichipgipani bidingo aganengon, a·bachenge kobor man·ani gitade, uamangko koela bikotna re·chakatengachim ine nikatna man·a, Pa Sangma aganaha.
“Uamang maiko dakna miksongachim chinga da·o aganna man·kuja indiba, uamang koela bikottainan miksongachimkon ine chanchiatna man·a,” Chief Minister aganaha. Indake ong·genchimoba koela a·kol ning·o gimaenggipa sakbonga manderangko ra·ongkatna Sorkari bil ama gitan kam ka·gen ineba Pa Sangma agandapaha.
Indake ongengon, mikka chimarangchi, naljokatani kamrangko ka·anio ja·donggaatako man·enga, unomitingo Sorkari, naljokatani kamko ka·aniona National Disaster Response Force (NDRF)-koba okamataha ine chief minister aganaha.
“Uamangko tange rimongkatna pilak cholrangkon dakgen” ine aganan baksa naljokatna kam ka·anirangko Home Minister nirokatenga ineba Pa Sangma aganaha.
A·doko niamgri koela bikotaniko sandiatna sorkari chanchienga: CM
Date:
Share post:
