SHILLONG: MDA sorkari baksa bakrimgipa United Democratic Party (UDP), a·doko niamgri koela cho·a ba salrurani mamlao ja·ku de·anio ka·sinengani gimin changsatai, a·dok sorkariko matnangaha. Indiba party-ni president Metbah Lyngdoh, matnangako kakket ong·ja ine talate, ‘sorkari, a·doko niamgri koela cho·ani mamlako nirokenga” ine aganaha.
A·doko niamgri koela cho·a aro salrurani bidingo kobor ra·timgiparangni sing·anina Metbah Lyngdoh indine aganchakaha, “sorkari, a·doko niamgri koela cho·a ba gipin ong·gija kam ka·aniko nitate dongna nangja. Basakobade sorkarina, niamgri kam ka·aniko nirokanio neng·nikarang soka. Uandake Meghalaya-ni Home Minister-ba niamgri kam ka·giparangni kosako ja·ku de·na mikrakataha.”
A·doko niamgri koela salani bidingo jakgittele sandie kakketko sandiani gimin sing·on, UDP-ni chief, ‘iani bidingo sorkarisa chanchigen’ ine aganaha.
“Batanggimin bilsi 15-20-oni iandakgipa obostako nikbaenga indiba niamgri kam ka·aniko champengna sorkari ja·ku de·na nanggen,” ine Metbah aganaha.
Unbaksana UDP, ong·gija kam ka·aniko nike jrip donggipa ong·ja ineba talataha.
Adita jarang skang, koela salgipa truk gariko photo ka·a ba video ra·aha, jekon niamgri koela salenga ine aganaha, indiba apsan somoion essential commodity ba nangchongmotgipa bosturangko salruragipa truk garisa ine u·ina man·aha. Beben gimik truk garian nangchongmotgipa bosturangko salgipasa inede agangja indiba maimancha dongachim uko chinga nikeja, uni gimin sakki dongosa nambata, ineba UDP-ni chief aganaha.
Uandake East Jaintia Hills-o ong·gipa a·sel, jeon sakbonga koela cho·giparang koela kuario jachange dongenga, uko janapate, ‘ian niamgri koela cho·ani mamla ong·a, iani bidingo FIR segatna nanga. Sorkari aro Home Minister iani bidingo raken kam ka·gen ine ka·donga, ine Metbah aganaha.
