TURA: Tura Don Bosco College (DBC)-ni skigiparang aro chatro-chatrirang, pangna bilsio June 5 tariko a·gilsak gimikni manderang World Environment Day (WED)-ko gisik ra·e maniani bak gita mejal Sonibaro “Ecosystem Restoration through Stakeholders” ingipa pangchakaniko done Webinar program-ko ong·atanichi WED-ko maniangskaaha.
Mejalo DBC-o Webinar program-ko ong·atachi WED-ko maniani somoio Tura-ni Lok Sabha MP Mrs. Agatha K. Sangma, salni dal·batgipa sokgipa ong·e WED-ko maniani miksonganiko aro a·gilsako an·chingni samtangtango donggipa bol-wa·arang, buring-bolgrimrangko ripinge rakkiani bidingo mongsonggipa skiprakgipa ong·skaaha.
Sangma-ni skiprakani somoio, ua mejalo program-ona re·bae bakko ra·enggipa chatro-chatrirang aro skigiparangko an·chingni ma·gipa a·gilsakko ripinge rakkichina gitaba didiangaha.
Uni aganprakanio janapani gitade, ua saksa MP ong·e samtangtango donggipa buring-bolgrimrangko aro pilak janggi gnanggipa jonturangko ripinge rakkiani gimin ua an·tangan dingchikee ba ba raken kamko ka·ronga, aro ua badiaba jolo samtangtango ripinge rakkigimin ong·telaigipa biaprangona re·ange nina sikgipa saksa ong·a ine aganaha.
Uandake, Meghalaya sorkarini State Environment Impact Assessment Authority-ni chairman gitcham Shri TTC Marak, IFS (Retd.)-ba uni jinmarangna aganprakani somoio sorkarini gita skang salrango buring-bolgrimko ripinge rakkiani gimin agan-talatangaha.
Da·o samtangtango dongenggipa buring-bolgrimrangko ripinge rakkina gita a·dok sorkari aro a·doko songdongenggipa sakantini daito donga. Unigimin, a·doko songdonggiparangna uarangko ripinge rakkiani bidingo awareness programrangko ong·atachi skie on·a nangenga ineba ua didiangjolaha.