TURA: Raksamgre Civil Sub-Division-ni ning·o donggipa Rongsai police outpost-o kam ka·enggipa sipairangna dongchakani nokrang dongjae neng·nikanirangko chagrongna nangtokenga ine Garoland State Movement Committee (GSMC) Pedaldoba Regional unit parakatenba, ia police outpost-o kam ka·enggiparangna permanent building-ko rike on·china a·dokni Chief Minister Conrad K Sangma-na sedoataha.
Chief Minister-na seatgipa chittio GSMC Pedaldoba regional unit-ni chairman Rimjen Ch Sangma-ni parakatani gitade, Rongsai police outpost-o kam ka·enggipa sipairangna nokrangko rike on·kujaengani a·selan ia outpost-ni sipairang, 2012-13 bilsirangonin Pedaldoba secondary school-osa dongchakenga aro ia biapoba kam ka·giparangna kuturirang, babilsirang, ringani chirang aro toilet-rang dongjani a·selan sipairang neng·nikanirangko chagrongna nangtokenga.
Ia police outpost-na nokrangko rikna gita adita bilsirangna skangan Assam simani Kurung Saltop-o department-ni a·a donggipaon biapko on·manahachim indiba da·alonan ia biapo nokrangko rikkujaenga ineba GSMC Pedaldoba unit parakataha.
Ia Rongsai police outpost-ara Assam-ni simao ong·e kam ka·enggipa sipairang salo konta 24-an nirok sandianirangko dakna nangenga ine janapatengon, ia sipairangni neng·nikaniko ma·sichake ta·raken dongchakani nokko rike on·china gita GSMC Pedaldoba unit-ni chairman, a·dokni Chief Minister-ko didiataha.
