SHILLONG: Meghalaya Energy Corporation Limited (MeECL)-ko chalaina gita Rural Electrification Corporation Power Distribution Company (RECPDCL)-na on·na skang kamrangko name nipilchengchina aro dingtang dingtang dolrang baksa apsan asonge chanchirimchengchina gita Meghalaya Assembly-ni Speaker aro United Democratic Party (UDP)-ni dilgipa Metbah Lyngdoh, NPP dolchi dilenggipa Meghalaya Democratic Alliance (MDA) sorkariko didiataha.
Lyngdoh-ni parakatani gitade, iani bidingo ua chief minister baksana dingtang dingtang dolrang baksaba chanchirimaha aro pilakan MeECL-ko chalaina gita gipin company-na pakwate on·aniko nangniktokjaengachim.
Power company-rangna dongkuenggipa grorangko gamna gita REC-ara loan-ko on·enggipa agency ong·a ine talatangengon, bilsiprako sorkari iana gong kror 120-ko gamna nangaigen aro bilsi gittamni ja·manode gong kror 300-mangkosan gamna nangaigen ine Assembly-ni Speaker, MeECL-ko gipin company-na pakwate on·gija loan-rangko gamna jotton ka·e nichina sorkariko didiataha.
MeECL-ni gong kror 1,345-na batgipa loan-ko gamgenma ma MeECL-ni mitam distribution circle-rangko chalaina gita REC PDCL-na on·gen, iako a·dok sorkari, re·baenggipa antio chanchie ja·kuko de·na miksongengachim.
MeECL-ko gipin company-na chalaina on·genchimode iano kam ka·soenggiparangna jajrengna nangani ong·enga aro MeECL-o neng·nikanirangkosa man·dapaigen, uni gimin sorkari pilakna skangba dingtang dingtang dolrang baksa agangrike iako nipiltaina nangenga ine Lyngdoh parakataha.
